محشش و صديقه لملوم و فلونزا الخنازير ,, حكاية

السلام عليكم ,, اليوم كعدت على تلفون صديقي اللي يومية انعل ساعة السودة اللي اتعرفت عليه بيها وهو المواطن العراقي لملوم ,, خابرني ساعة 5 الفجر مثل الخبل ,, جنت توني دا اعيش اللقطة بالحلم و 9 ساعات نايم و الوكت كله دا اقنع البنية اطلع وياها للمطعم و اول ما كالت اي لملوم دك عليه ,, و طبعا البنية طفرت لان لا ظل حلم ولا بتيتة و هسة اكيد لكت واحد غيري نايم طفرتله للحلم ,, واحد غيري مجنص ما عندة طركاعة اسمها لملوم ,, المهم خابرني لملوم و يعيط :

- محشش محشش
- شكو من خررب ابوك مات؟؟
- لاع
- امك ذبوها ببوكا ؟؟
- لاع
- اخوك رجع يعض ابطه ؟؟
- لاع
- اي ما اتكلي شبيك مخابرني ساعة 5 الصبح ؟؟؟ اي مو حتى اذربيجان كعدو من النوم على صوت عياطك شبيك؟؟
- اللي يصير بي فلونزا الطنازير شيسوي؟
- يسوي حفلة , شمدريني قابل اني ممرضة روح اسأل ابوك بعدين تعال هنا طنازير شنو؟
- مو اني مصخن و مدا اعرف بيه فلونزا الطيور لو الخنازير فكلت خاف ثنيناتهم تواعدو براس الشارع و اتدعبلولي سوية و صارو طنازير
- ايا طنزير يا ابن ال .. اعوذ بالله من الشيطان ,, بابا روح اتغطة و نام مابيك شي
- يعني اعتبره وعد؟؟
- لك بابا لا اتخبلني امشي روح ولي نام ترة اضربك راشدي

طبعا لملوم خاف من الراشدي و سد التلفون و الاثول ما يدري انه ما اكدر اضربه راشدي لان دا اخابرة من الموبايل و ما اكدر اوصل ايدي لخده الخايس ,, المهم نسيت السالفة و نمت ,,

ثاني يوم من الصباحيات ,, لكيت فد شي ملفوف بجادر ,دققت النظر لكيت انسان يعني كائن حي متلفلف بجادر و واكف كبال بيتنة, و فوك الجادر على راسه حاط جدر يمكن مال ضغط ,, و شايل سبورة ما اعرف من يا ابتدائية خامطها كاتب عليها ,, من أجل ان لا تنعلس ,, دزلي بوسه بالهوة ولا اتسلم ,, دققت النظر اكثر ,, لكيته لملوم ,, عاد فوته للبيت راسا لا يشوفه احد و يخابر الشماعية عليه ,, و لملوم عندة سوابق هناك ,, خاصة اخر مرة لمن شاف قطعة مكتوب عليها قف ,, نزل من السيارة و ظل واكف بصفها 3 ايام الى ان راد يموت من التعب و العطش ,, المهم ,, فوته للبيت حتى أستفسر عن حالته ,, أشرلي بمعنى يريد بوسه هوائية ,, باوعت عليه ,, و باوعت على نعالي و رجعت باوعت عليه ,, و سويت بيدي حركة معناها شي ديطير بالهوة ,, افتهم التهديد و سكت و فات و كعد ببيتنا

- ممكن اعرف شمسوي بروحك و شنو هال الزي التنكري لملوم انتة طالع جنك كوخ مال اسكيمو بصراحة
- اني بيه خونزة الفلازير
- شنو؟؟؟؟

طبعا نسيت اكلكم لملوم من يكون منفعل الحروف عندة اتكوم تركص جوبي و الوندوز مال لسانه مو بس ينضرب و انما ابو ابو ينسمط بصورة خايسة ,,
- بيك فلونزا الخنازير و جاي يمي ؟؟

شعرت بخطر عظيم و كانما سبيت كصاب شايل ساطور و بقيت واكف بمكاني ,, حاولت اكول شي لكن الشي الوحيد اللي كدرت اسوي انه اباوع على اصبع رجلي الجبير ورة ما حسيت انه اصبع رجلي الصغير صغر بالزايد و شعر خشمي بده يوكع من الخوف و حسيت ببطباطة طلعت جوة أبطي ,,

طبعا راسا رحت للبانيو اللي بالحمام (اي لعد وين خالين البانيو بالسطح؟؟) و مليته قاصر و شلت لملوم بكرك حتى لا اطخة و شمرته بالقاصر ,, كلت بلكت يتعقم ,,, طبعا اني كاعد اكتب اكتب و لملوم بالبانيو هسة حاليا و اللي محيرني انه دا اسمع صوت تريوعة ,, هذا بس لا مشتبه بالقاصر سفن و كاعد يكرع ,, مخبل و يسويها ,,

و اني هسة حاير و ما اعرف شسوي ,, زين اذا اني انعديت هسة و متت ,, منو راح يسوي اعتمد الموضوع الجديد .قابل اخلي بالحاسبة الى يوم القيامة بلا اعتماد هية اعتماد لو عماد والله دخت و صرت دختال (هذا اخو الديجيتال) .ماذا اسوي؟؟ و منو راح يتابع الردود ؟... ؟؟ زين اذا اني متت لملوم يبقة بالقاصر الى ان ينكلب جفية؟؟ و اذا طلع ورة 20 سنة صاير مومياء مو راح اتحمل ذنب انه ما وديته للمتحف البغدادي ؟؟ هاي شلون شغلة ,, و الى ان اطلع لملوم من التحية ,, هذا اجمل بانيو مني محشش و نتمنى لكم فلونزا عادية بلا خنازير بلا بطاريق بلا دجاج يسوي قاق قييق ,, و هاهية و ديلة و فيمالله

- محششششششششششششش
- اي حبي لملوم جايك ,, عندك ريست 10 دقايق الى ان اترس البانيو تيزاب !!

- تمت -

مخموط لامانة
قريته وعجبني التحشيش ونقلته

هههههههههههههههههههههههههه
عاشت ايدك

حوبي دومك مبدع

محشش و صديقه لملوم و فلونزا الخنازير ,, حكاية Icon_cheers

وايدك حبي منور الموضوع

ههههههههههههههههههه
حلوة

محشش و صديقه لملوم و فلونزا الخنازير ,, حكاية 735545

انعل ساعة السودة اللي اتعرفت عليه

محشش و صديقه لملوم و فلونزا الخنازير ,, حكاية 97130

يايابة هاية حلوة
محشش و صديقه لملوم و فلونزا الخنازير ,, حكاية 97130

» لا اله الا الله ,, الزواج علينا حق ,, (محشش)