لا اله الا الله ,, الزواج علينا حق ,, (محشش)

بمزيد من الأسى نزف اليكم خبر زواج واحد من اصدقائي ,, و اللي تزوج مأسوفا على شبابه اثر قصة حب لم تمهله طويلا ,, و ستقام الزفة على روحه الطاهرة في نادي الصيد و لمدة يوم واحد ,, انا لله و انا اليه راجعون ,,

دا أفكر اخلي هاي القطعة بيوم عرسي ,, خاصة و اني كاعد بالسيارة و المكموعة بصفة مكيفة ,, على شنو صافنة عال جكمجة و تضحك ما اعرف ,,و تدعبلت الى مخيخي فكرة مكرشة و تشمل على انه مرتي اتخبلت فجأة ,, و بصراحة خفت لا اتروح اتطلع سجينة و تنكلب مشجعة جزائرية و تضربني ,, خاصة ورة ما لاحظت اكو شخطة مال موس فوك شفتها اليمنة يعني الاخت عدها سوابق بسجن الكاظمية يجوز ,,

كاعدين بالسيارة و الزفة و واحد ديسوقلنة ,, يمكن ابوها الخبل ,, ابوية ما اعرف وين , يمكن غلط بالزفة و راح وية غير عرس ,, و هسة اهل العرس رابطي فوك القمارة عال سيباية و طالعين بي لاقرب مركز شرطة عبالهم انتحاري ,, المهم ,,

- حبيبي اكو واحد ديصيح جرايد جرايد ,, اريد جريدة و باكيت سومر (بالله هاي شحجي وياها)
- ورة الزواج انشالله مو بس اجيبلج جريدة ,, الا اخلي صورتج تطلع باول صفحة بس كولي آمين ,, انتي اتحبين المطربة ذكرى الله يرحمها مو؟
- اي
- انشالله اتشوفيها باقرب فرصة ,,

بعد أسبوع ,, تبدي اتصير شغلات اتخليك تكفر بحياتك اللي راح تكتشف انه هي عبارة عن ربع قرن من السعادة انتهت بيوم ما رحت للمحمكة و عقدت ,, و راح تكتشف انه الحلقة راح تبدي تخنك ركبتك ,, مو أصبعك ,, خاصة ورة ما مرتك تكشف عن وجها الطبيعي ,,

- هاي منو ؟؟ انتي منو و شجابج هنا ,, و تكمل و انتة راح تبجي : خالة مرتي وين بلا زحمة ؟؟؟

طبعا ,, بلا مكياج و بلا سوالف و ترتيبات راح تكتشف انه انتة اتزوجت كونية مال سمنت , وراح تكتشف انه المكياج ممكن يخلي عجرم ,نانسي عجرم , , و ممكن يخلي وهبي , هيفاء وهبي و اذا مكياج قوي ممكن يكلب سالوسة انعام سالوسة ,, خاصة اول ما تكعد من النوم راح تضطر اتكلها المرتك حبيبتي كملي نومتج و لا اتكعدين الى اذا صار شي ضروري كلش ابوج مات هيجي شي ,,

- الو حبيبي ,, جيبلي معجون طماطة و معجون مال اسنان ,, و
- افتهمت افتهمت و معجون حلاقة ,, لان ملاحظ البارحة بالليل راح تكمل السكسوكة عندج ,, باقيلج يومين و تكمل لحيتج حياتي ,,

اتكول عبالك متزوج تامر حسني ,,

من فقرات الزواج الحلوة احساسك الدائم انه انتة سايق تاكسي ,,

- حبيبي وديني لبيت اهلي ,, لبيت اهلي وديني ,, اهلي لبيت وديني ,, لبيت وديني اهلي ,, بحيث اتفكر جديات اتأجرلهم الحمام و يكعدون بي حتى تخلص من هال مشاوير و تعال ادفع بانزين و اشبع ازدحامات والله شنو الخاتون اتريد تروح لامها تسالها عال دولمة اذا اتحطلها شكر تنكلب مربة؟

- أريد هدوم ,, و ملابس و تنورة جلد هدهد و ياخة للقميص و اريد كوستم اخضر مقلم باسود و اريد حوذاء كتان و دشاديش للعيد و عباية اسلامية و و و و و 12 صفحة بالوورد على شرط حجم الخط 8 حتى يادوب ايكفي

و انتة خطية الراتب باقيله اسبوعين و اذا تشتري هاي كلها فمعناها انه لازم اتبسط بباب بيتكم اتبيع المجلات مال مجلتي اللي محتفظ بيها من ايام الطفولة ,, او تحرك روحك و تخلص من الحياة الشافطة ,,

- حبيبي اريد اسوي عملية تجميل لخشمي اسوي نفس خشم هيفاء وهبي ,,

يلا ما بيها شي ,, عال اقل خشم هيفا راح يكون ببيتك ,, و شوية شوية ورة فترة راح تلكة هيفاء وهبي كلها عندك , اريد اصغر عيوني اريد اكبر حلكي اريد انفخ شفتي (هاي سهلة يم البنجرجي بس كلة شفة مرتي نازلة تنحل بالف ونص) , مثل واحد جان عندة وندوز اكس بي طوره سوا فيستا ,, و اتصير عندك هيفاء وهبي كاملة امكملة على شرط ما ايكون عندك واحد عرف اسمه رجب ,, (حوش صاحبك عني)

راح تكتشف مرتك تشتغل بدائرة الضريبة ,, او اكو بلوعة بجيبك ,, وحدة منهن ,,

- ولج جان اكو خمسين الف وين ولت؟؟
- هاي اللي اشتريت بيها النافورة اللي بنص الهول؟ صرفتها حياتي

تركض مهرولا للهول و انتة اتفكر شلون الهول ممكن تنحط بي نافورة ,, راح تلكة نافورة بنص الهول ,ام المي و ساحبيلها تأسيس من الشطافة عن طريق صوندة رفيعة خضرة ام الانج و ربع , راح تشتبه انه انتة واكف بساحة كهرمانة مو ببيتكم ,, و اتفكر انه منين تطلع على بدالة العلوية من الطرمة لو من باب المطبخ , اتسلم امرك لله و تطلع باكيت الجكاير و اتدخن 3 جكاير سوة من القهر ,,

قالو في الزواج ,,

الزواج سبب رئيسي لامراض القلب و الشرايين و سرطان الحنج ,, ننصحك بالخطوبة فقط ,,

(الدكتور فان هالتر طبيب خفر بالنرويج )

ماكو فرق بين الدجاجة و كريم الوجه ,, ثنيناتهن ايبيضن

ما اعرف منو كاله و يمكن ماالها علاقة بموضوعنة ,,

لا تتزوج ,, قتل النفس حرام في كل الاديان ,,

نبوخذنصر بالتعاون مع شركة حمورابي لاستيراد المسلات المحدودة ,, مساهمة مختلطة ولد و بنات

سيصلك الضغط و السكر بسرعة تعادل 1,34 مرة من سرعة الضوء بعد الزواج ب 23,21 ثانية
ألبرت آينشتاين

و الموفقية للجميع بما فيهم اني (اي لعد ابقة دايح بلا موفقية؟؟
لا اله الا الله ,, الزواج علينا حق ,, (محشش) F_0005m_6347a18

للامانة منقول

HA HA HA HA HALO HAY MASHKOR HOBY

لا اله الا الله ,, الزواج علينا حق ,, (محشش) 97130

خوش موضوع

لا اله الا الله ,, الزواج علينا حق ,, (محشش) 463904

» محشش و صديقه لملوم و فلونزا الخنازير ,, حكاية